Хальмг туульс

Шар богшада

russian

Кезәнә бәәҗ, шарлҗн деер суудг шар богшада бәәҗ. Йиртмҗ мини гиһәд, чашкурдад санамр суусн богшадаг генткн шарлҗн хатхна, бийән дөөглҗәнә гиһәд богшада доран өсрңнәд, уурнь күрәд, нег мөсләд, шарлҗиг уга кех итклтә нөкд хәәнә.

Чамаг, чамаг! Үзүричн хазх яманд оч келнәв.

Яман, яман, тенд нег хазх зөвтә юмн бәәнә.

Яһлав, яһлав, түңгичн оч хазх биш, ишксән асрҗ ядҗанав.

Чамаг, чамаг! Ишксичн идх чонд оч келнәв.

Чон, чон, тенд нег идх зөвтә юмн бәәнә, оч ид.

Яахув, яахув, түңгичн оч идх биш, кичгүдән асрҗ ядҗанав.

Чамаг, чамаг! Кичгүдичн алх адучнрт оч келнәв.

Адучнр, адучнр, шулудтн, мөрдин амһаһинь бичә һарһтн, мөрдән ташмгдҗ өгтн, тенд нег алх зөвтә юмн бәәнә, оч алтн.

Ях, ях! Хаана хату йоснас хальтрҗ, хамаран одхвидн, хар үстә толһасан хама йовҗ бултулхвидн, түңгичн оч алх биш, адуһан геечкәд, хаанас әәһәд үкҗәнәвидн.

Чамаг, чамаг! Энтн нанд көтлвр болв, тадниг цокх хаанд оч келнәв.

Хан, хан! Бурхн герч, тана зәрлгәр болг, тенд нег гүвдх юмн бәәнә, оч гүвдтн.

Теңгр, һазр, усн мини булг! Түңгичн оч гүвдх биш, әрмгән дааҗ ядҗанав.

Чамаг, чамаг! Әрмгичн шимх хулһнд оч келнәв.

Хулһн, хулһн, тенд нег шимх зевтә юмн бәәнә.

Һазр мини гер! Түңгичн оч шимх биш, кичгүдән асрҗ ядҗанав.

Чамаг, чамаг! Кичгүдичн алх күүкдт оч келнәв.

Күүкд, күүкд, тенд нег алх зөвтә юмн бәәнә.

Нарта орчлң дүркртхә! Түңгичн оч алх биш, туһлмудан экләнь ниилүлчкәд, экнрәсн әәһәд, шуурха һазрт орхар үкҗәнәвидн.

Экнр, экнр, тенд нег закрх юмн бәәнә.

Көк Теңгсин усн аршан болг, көк теегин урһмл хот болг! Тедничн оч закрх биш, ноосан зуллҗ ядҗанав.

Чамаг, чамаг! Тиигхлә, бийән саглтн, нооситн тарах хү салькнд оч келнәв, мини сүл әрсм ян.

Хү салькн, хү салькн! Тенд нег тараһад, таран-тәкм кех юмн бәәнә.

Хү салькн богшадад келҗәнә:

Урднь киитә юмн эрҗ сурдго билә, би эврән дурарн көдлдг биләв.

Хү салькн эәмшгтә догшнар көдләд, экнрин ноосинь тараһад, ирс-тирс кеһәд, үүлнлә хутхулад авад йовв. Экнрнь күүкдән цокад, күүкднь хулһна кичгүд алад, хулһн хаана әрмгинь шимәд, хан адучнран гүвдәд, адучнрнь чонын кичгүд алад, чон ямана ишкс идәд, яман шар богшада хатхсн шарлҗ идәд, шар богшада зөвән авад, эндр өдр күртл ишкрәд нисәтә.